關於恐懼。
如果真係要驚國安法，其實一早就應該驚。
我自己就正正係驚咗一排嘅人。
不過隔咗咁長時間，已經乜都驚完喇。
宜家條法真係嚟到，我反而好平靜，可以安然咁面對。
至於有人宜家先開始割𥱊，就未免太遲啦⋯⋯
香港宜家就好似遇到怪獸襲擊城市咁樣。
大家當初喺機場搵到一架被棄置嘅飛機，商量過後，就決定揸呢架飛機去撞哥斯拉。
打算盡地一鋪打怪獸。
成個計劃明顯係唔安全。
但有條友又淆底，又唔想離羣。
係都要上機。
結果到準備要撞怪獸嗰陣，佢就話要俾佢落機先。
「唔該前面有落呀！」
你估家陣搭小巴返屋企咩？
唔通真係飛機墜毀前一秒，從飛機上跳落地面就冇事咩？
宜家，苦難連繫你我，大家骨肉相連。
即使搵嚟一個最專業嘅分割員，俾佢望住呢個時局，佢都會覺得已經冇得再割。
與其懷疑自己，終日惶懼，倒不如相信當初嘅自己。
各位觀眾好好保重，我會一直支持你哋。
係咁多。
Search